Sat, 08 Aug 2020

Aklanon News: DA nagtao it P99M nga bulig sa mga Aklanong mangungua

Philippine Information Agency
07 Jul 2020, 10:38 GMT+10

KALIBO, Aklan, Hulyo 7 (PIA) -- May kabilugan nga P99,245,000.00 nga ayuda nga kwarta ro gintao kunrundaya eamang it Department of Agriculture (DA) sa mga mangunguma sa Aklan sa idaeum it programa nga Financial Subsidy for Rice Farmers (FSRF).

Ro bulig nga P5,000.00 kada mangunguma hay sangka pag-ayuda it gobyerno paagi sa DA nga makapahagan-hagan sa sitwasyon nanda sa tunga it pagpanaeasa it COVID-19 kon siin ro Aklan hay ginpaidaeum sa Enhanced ag ku ulihi hay sa General Community Quarantine.

Inisyatibo man it DA ro pagbulig para tabangan ro mga maintok nga mga mangunguma nga nagatanum sa sang hektarya ag panaba nga eugta nga nakapalista sa Registry System for Basic Sectors in Agriculture (RSBSA).

Ginpatigayon it Land Bank of the Philippines (LBP) Kalibo Branch ro pagpanupod it ayuda sa mga mangunguma sa 13 nga mga banwa it Aklan pareho ku Altavas, Batan, Balete, Banga, Kalibo, New Washington, Libacao, Madalag, Malinao, Lezo, Numancia, Makato ag Tangalan, samtang ro LBP-Caticlan Branch ro nagpanupod it kwarta nga ayuda sa mga mangunguma it Ibajay, Nabas, Malay, ag Buruanga.

May kabilugan nga 19,849 nga mga mangunguma sa Aklan ro nakabaton it ayuda, nga ginpanupod sa anda mismo nga mga banwa.

Sa pihak nga parte, 700 nga mga mangunguma ro owa makabuoe ku andang ayuda, sa mga rason nga "double entry", nangin benefisyaryo man it SUREAID (sangka klase it bulig man gihapon sa mangunguma ), namatay ro benefisyaryo, ag owa nakaadto sa gintaeana nga lugar ag adlaw ro benifisyaryo.

Ro pagtao it ayuda sa mga sari-saring kabanwahunan hay gin asistihan it Department of Agriculture 6 sa pagpamuno ni Regional Technical Director Remelyn Recoter, Office of the Provincial Agriculturist (OPA) sa idaeum it pagpamuno ni Acting Provincial Agriculturist Salome David, ag mga Municipal Agriculture Officers (MAOs) it mga kabanwahunan.

Samtang, bilang kaparte it pagbulig it Gobyerno Probinsyal it Aklan sa mga Aklanong mangunguma agud indi masyadong maapektuhan it pandemya sa kwarantina, nagpatigayon ra it Seed Assistance Program bilang pagsuporta sa mga nagatanum it tinuean-on agud sige man ro produksyon it freska ag masustansya nga tinuea.

Suno sa OPA-Aklan, ro probinsya, sa idaeum it pagpamuno ni Governor Florencio T. Miraflores, hay nagbakae it P1.2 milyon nga balor it mga inugtanum nga busoe it mga tinuea nga pechay, hamtak, okra, ampalaya, taeong, patola, kamatis, tangkong, mais, pipino ag kaeabasa. (JSC/VGV/PIA6 Aklan)

More Southeast Asia News

Access More

Sign up for Southeast Asia News

a daily newsletter full of things to discuss over drinks.and the great thing is that it's on the house!